خازوق ليكون خير العصيان فكرة غير

عارفين ايه المشكله الحقيقيه فى فكرة الاضراب او العصيان المدنى
اننا شعب لا يقرأ التاريخ.. وشعب اتربى على فكره "امشى جمب الحيط" و"خليك فى حالك" "ومن خاف سلم"
قبل ما ترفض فكره...اقرا عنها ..شوف تاريخها
شوف مدى تاثيرها على تحرير الشعوب من العبوديه والاستعمار حتعرف ان جدودك نفذوها ضد الاحتلال فى سنه 1919 ؟؟ ومصر موقعتش ولا سقطت الحمد لله و لا اتقسمت ولا انهارت

شوف تاثير الاضراب السلمى فى تحرير الهند من الاحتلال تحت زعامة غاندى
شوف تاثير اضراب بولندا لمدة 11 يوم فقط وتحويلها لدوله مدنيه بدل ما تبقى دوله حاكمها عسكرى
الاضراب حق مشروع يكفله الدستور المصرى
قانون 12 لسنه 2003
الماده رقم 192 و 195.. وتكفله الأمم المتده ووافق عليه رئيس الجمهوريه
بالقرار 537 لسنة 1981... اذن الاضراب ليس بلطجه وليس خروج عن القانون
نحن فى منتصف ثوره..حد يعرف الثوره الفرنسيه قعدت كام سنه؟؟حد بيحاول يقرا تاريخ عشان يفهم كيف تنجح الثورات

حد يعرف ان ثورة رومانيا فشلت لانهم تركوا مجلس عسكرى يحكمهم فقضى على الثوره وصفى كل الثوار جسديا فى 3 سنوات واصبح اسمها "الثوره المغدوره" مغدوره من الغدر
شوف صورهم وهما متصورين مع الدبابات وفرحانين بحماية الجيش... وشف بعد 3 سنين ازاى كل النشطاء والثوار اتقتلوا...
مينفعش نسيب الثوره تموت
نصف ثوره= دمار امه
ثوره كامله= نهضة امه

اعتقد كلنا شفنا فكره نهدى ونخلى المجلس يشتغل ويحقق الاستقرار
ادوا المجلس فرصه..ادوا عصام شرف فرصه..ادوا الجنزوى فرصه..طب ادوا البرلمان فرصه
طب ايه رايكم ندى الثوره فرصه على سبيل التغيير..
بدل ما كل دعوى للأستقرار بتجيب لنا فوضى..وزى ما 30 سنه خوف تحت حكم مبارك ما جابونا لورا وكل بلاد العالم سبقتنا

زى ما فكرة قول نعم فى الأستفتاء الدستورى عشان الأستقرار ومشفناش اى استقرار من وقتها
واكتر وقت خوفنا من الفوضى فى 18 يوم ثوره..كانت اكتر وقت البلد فيها مستقره
وقتها محدش كان بيرفع رشاش فى وش حد فى الشارع فى وضح النهار ويثبته
اللى بيلعن الثوره... فكر كده شويه ان الثوره لم تحكم عشان تلعنها

الي بيقولك انتوا عاوزين تقعدوا في بيوتكم وتعملوا عصيان مدني وتسقطوا الدولة....
قوله طب ما ضباط الشرطة قعدوا شهور في بيوتهم بياخدوا مرتباتهم من جيوبنا .. ماحدش قال إسقاط الدولة ليه
البلطجيه ما هم الا موظفين ومجندين فى امن الدوله ومسجلين خطر تستخدمهم الداخليه والمجلس لارهاب الشعب
عدد افراد الشرطه المصريه يعادل = ضعف عدد اعضاء الشرطه فى" كل دول الاتحاد الأوربى" مجتمعين
يعنى قدهم مرتين...قد ظباط شرطه كل دول اوروبا..مرتين..وبياخدوا مرتباتهم من ضرايبنا,, ومش بيأدوا لينا اى خدمه فى المقابل... غير انهم حاليا بيحموا المخلوع والعادلى وبيأمنوهم.. وبيأمنوا مليادرات طره.. و بيطلعوا علينا البلطجيه حسب خطط مسبقه لترويع الامنين كأستكمال لمسلسل فتح السجون اللى قام بيه وزيرهم العادلى.. فى جمعة الغضب 28 يناير 2011

يعنى مش صعب انهم يرجعوا يشتغلوا لكن هما عايزين البلد تبقى ده حالها مش عايزنا ندوق اى حلاوه او اى ميزه للثوره او بمعنى اصح بيعاقبوا شعب بأكمله هما والمجلس العسكرى

هم اضربوا عن تحقيق مطالب الثوره السلميه عيش - حريه -عداله اجتماعيه- كرامه انسانيه
ونحن نضرب عن العمل ...حتى تحقيق اهداف الثوره..
واحده بواحده.. والبادى اظلم

حتى لو فى ناس حتعانى فى هذا الاضراب بس المستقبل حيكون افضل ان شاء الله
لكن لو فضلت العصابه اللى بتحكم البلد وبتحمى مصالح مبارك والفاسدين هى اللى بتحكمنا... الآكيد اننا حنبقى من سيىء لآسوأ..
واللى يكون عنده مقدره ماديه يساند اى حد من عمال اليوميه والفقراء يعمل ده وربنا يجعله فى ميزان حسناته

كن مع الثوره...كن مع الحق و العدل و الكرامه...كن مع مستقبل افضل لكل المصريين